Pincho de Nadal 2014

 Estimados socios e socias: 
 Con motivo do Nadal a AV "O Camiño das Fontiñas" organiza o próximo 13 de decembro, desde as 13:30 ata as 14:30, o tradicional pincho do Nadal na cafetería Rakel, rúa Fontiñas
É un acto para que todos e todas compartamos uns agradables momentos de convivencia veciñal e  brindaremos  polo novo ano. 
Prégase puntualidade , xa qué, o que chega tarde nin escoita misa nin come carne.

BO NADAL e PRÓSPERO 2015

Festa do Outono 2014

Invitación Festa do Outono 2014

Estimados socios e socias,

A asociación de veciños organiza o sábado 18 de outubro, na rúa Coto, a festa do outono coas seguintes actividades:

De 16 a 19 H.

XOGOS POPULARES INFANTÍS

Carreiras de sacos. Tiro de corda. O pano. A culler. Piñata. Inchables. Os nen@s deben vir acompañados dos seus pais ou persoa adulta e respectarán as normas da organización.

De 18 a 19:30 h.

1º CONCURSO DE TORTILLAS

Premiaranse as mellores tortillas. Ver as bases ao pé 

Desde as 18 h.

MAGOSTO POPULAR

ACTUACIÓN MÚSICAL

DEGUSTACIÓN de tapas de tortillas feitas polos veciñ@s, empanada e castañas.

As bebidas envasadas terán un custo de 1€ e as bebidas non envasadas serán de balde.

Bases do lº concurso de tortillas Camiño das Fontiñas

1.     Poden participar todos/as veciños/as de Santiago, sexan socios/as ou non da asociación veciñal “O Camiño das Fontiñas”, agás os membros do tribunal.

2.   As tortillas presentadas pasan a ser propiedade da organización para a súa degustación polos asistentes.

3.    Cada participante presentará unha sola tortilla a concurso. A tortilla terá un diámetro mínimo de 24 cm., e deberá ter os seguintes ingredientes mínimos: ovos, patacas, cebola, sal e aceite.

4.    Traerase a tortilla xa preparada da casa o día 18 de outubro e presentarase, entre as 17:00 e as 18:00 horas, na carpa da festa. Cada tortilla será identificada con un número e será exposta aos asistentes ata que o tribunal faga publico o seu veredicto.

5.    As tortillas presentadas serán catadas e valoradas polo xurado do concurso entre as 18:30 e as 19:00 horas. O fallo do xurado será inapelable.

6.   Os elementos a valorar polo xurado serán:

·       A presentación xeral (ata 2 ptos.), Puntúase o seu aspecto externo.

·       O sabor (ata 5 ptos.) Terase en conta os ingredientes empregados e o punto de sal.

·       A elaboración (3 ptos.). Valorase o grado cocción dos ingredientes.

A puntuación máxima son 10 puntos.

7.    Haberá un total de 3 premios: 1º Premio: 30 €. 2º Premio: 20 €. 3º Premio: 10 €.

8.   O concurso será declarado deserto no caso que a concorrencia non acade 10 tortillas.

9.  Ao finalizar a cata e anunciadas as tortillas gañadoras, todas tortillas presentadas serán cortadas en tacos para a degustación polas persoas asistentes.

10. Tortillas de exhibición. Os veciños/as que desexen participar nesta opción poden presentar cantas tortillas como queiran e sen límites no tamaño nin nos ingredientes. As tortillas que reciban máis votos do público será premiadas con un libro de cociña (as dúas máis votadas).

11. A participación no concurso implica a aceptación destas bases e a cesión das tortillas á organización para su degustación pública, aínda que o concurso se declare deserto.

Entrevista co Sr. Alcalde D. Agustín Hernández

Desde que se constituíu a nosa asociación reclamouse ao grupo de goberno e aos outros grupos municipais, reiterada e insistentemente, o arranxo das infraestruturas deterioradas do barrio e unha mellora dos servizos públicos. Estas reclamacións recolléronse nun informe da Xunta Directiva que foi presentado e aprobado na asemblea extraordinaria do 27 de outubro de 2011.

Na xuntanza mantida o día 4 de setembro de 2014 co Sr. Alcalde D. Agustín Hernández Fernández de Rojas e os concelleiros do grupo de Goberno Luís Meijide Rodríguez e José María Rosende Rico, a xunta directiva informou do estado en que se encontran as infraestruturas e servizos do barrio e solicítase as actuacións para dar resposta a estas demandas, de xeito resumido, os puntos tratados foron:

1. Actuación sobre a rúa Fonte dos Concheiros, Fontiñas e Valiño. Preguntouse polo estado de esta actuación que xa ten o proxecto redactado con un orzamento de 1.124.710€. que foi presentado aos representantes da nosa Asociación por Dª María Pardo Valdés o 3 de marzo de 3014. O alcalde indicou que esta actuación executarase, pero non se sabe cando e non se comprometeu con prazos. Esta actuación ordenará os espazos, eliminará barreiras arquitectónicas, humanizará o barrio, aumentará a seguridade dos veciños e mellorará as infraestruturas das rúas afectadas.
2. A urbanización da rúa Altiboia non está prevista e o Concello descoñece cal é a situación desta rúa e non está prevista ningunha actuación sobre ela a pesar do seu lamentable estado.
3. Outras deficiencias de menor entidade, que foron expostos a concelleiro D. José María Rosende Rico na xuntanza mantida o 22 de agosto, (Limpeza da maleza de varios espazos verdes, limpeza e reparación da fonte do “Cabezón”, reparación de varias farolas, colocar placas de identificación das rúas Coto e Cotaredo, eliminación de barreiras arquitectónicas nun paso de peóns) serán atendidas cos presupostos anuais que ten o Concello.
4.  A reparación dos sendeiros do parque do Cotaredo, a ampliación das pista de chave e petanca, a mellora do chan no que están instalados os aparellos de ximnasia serán tamén acometidos polo Concello. Estudarase a posibilidade colocar unha fonte con auga potable na zona das mesas de das pistas de xogos.
5. A actuación de mellora do pavimento dalgún tramo das beirarrúas e do pavimento da estrada da rúa Monte dos Postes non pode ser atendida con estes fondos polo seu custo, non existe compromiso do Concello para darlle solución nin prazos.
6. A actuación sobre un tramo da beirarrúa na Rúa Valiño e escaleiras co Camiño Francés vai a ser estudada e queda pendente de confirmar a súa realización e prazos.
7. A posta en marcha dos contedores soterrados das rúas Fontiñas e Coto está a espera dun informe da empresa responsable para coñecer o porque da súa fóra de servizo.
8. Vaise a estudar a posibilidade de reparar a zona das beirarrúas rúa Fonte dos Concheiros onde ai buratos de 20 cm. de profundidade. Parece ser que o problema e que é o Camiño de Santiago e isto dificulta o seu arranxo.

Xuntanza co concelleiro D. José María Rosende Rico

Xuntanza mantida o día 22 de agosto de 2014 co concelleiro adscrito á Área de Participación Cidadá. Departamento de Relacións Veciñais e Relacións co Medio Rural D. José María Rosende Rico e a xunta directiva. 

Informouse do estado no que se encontran distintos espazos do barrio e servizos públicos, que relacionamos de seguido:

1. Beirarrúa na Rúa Valiño e escaleiras co Camiño Francés. Requírese unha actuación que está pendente desde que se executaron as promocións de vivendas colindantes.
2. Rúa Monte dos Postes. Varios tramos requiren a renovación do asfalto. Varios tramos de beirarrúa requiren reparar o pavimento. 
3. Rúa Camiño Francés, Valiño e Altiboia. Varios espazos verdes destas rúas requiren a limpeza da maleza.
4. Rúa Fontiñas, fonte do “Cabezón”. A fonte require a súa limpeza e reparación.
5. Iluminación na rúa Valiño. Reparar a farola e revisar as outras.
6. Rúa Fonte dos Concheiros. Buratos de 20 cm. de profundidade que requiren unha actuación para evitar caídas e accidentes dos peóns.
7. Solicítase a posta en marcha dos contedores soterrados das rúas Fontiñas e Coto.
8. Rúas Cotaredo e Coto sen identificar. Requírese as correspondentes placas nestas dúas rúas.
9. Novo parque do Cotaredo. Require reparar o firme dos sendeiros e ampliar un metro as pistas da chave.
10. Eliminación de barreiras no paso de peóns da confluencia da rúa Fontiñas coa rúa Jaca.

Éxito na sardiñada de San Xoán.

A pesar da treboada das 8 da tarde, onte xuntáronse máis de 150 veciños e veciñas para comer sardiñas, empanada, saltar a cacharela e votar as meigas fóra con un grolo de queimada.

Sardiñada de San Xoán 2014

Información da ASEMBLEA XERAL EXTRAORDINARIA de maio 2014

Estimados socios e socias, remítese un resumo do tratado na asemblea xeral extraordinaria, celebrada o 7 de maio de 2014, e os acordo tomados.

Asistentes: 19 socios e socias.

Temas tratados:
1.    Lectura e aprobación da acta da asemblea xeral do 26 de febreiro de 2014
2.    Aprobación da cota de 6€ para segundos e sucesivos socios/as e menores dunha unidade familiar.
3.    Aprobación da modificación do Regulamento de filiación de socios/as na que se regulan as cotas dos socios/as.
4.    Información sobre a última entrevista mantida pola Asociación coa concelleira Dª María Pardo Valdés.
5.    Rogos e preguntas.

Acordos:
Por unanimidade apróbase:
1)    A acta da asemblea xeral ordinaria do 26 de febreiro de 2014.
2)    Manter unha cota de 12€ para os socios/as e establecer a cota de 6 € para segundos e sucesivos socios/as e menores dunha unidade familiar.
3)    A modificación do Regulamento de filiación de socios/as nos apartados no que se establecen as cotas coa seguinte redacción:
As cotas teñen sempre carácter anual (ano natural). A cota por socio/a establécese en 12€ anuais, independentemente do mes do ano en que se inscriba. Co fin de favorecer a participación nas actividades da asociación das familias e incrementar o número de socios/as, establécese unha cota anual de 6€ para segundos ou sucesivos socios/as e menores dunha unidade familiar, que así o acrediten cando realicen a súa solicitude.
A cota resultante das unidades familiares abonarase nun recibo único e calcularase aplicando a seguinte formula: Cota anual familiar =12€+((S+M)*6€), sendo S o nº de sucesivos socios e M o nº de socios menores. As cotas familiares sempre terán un sumando de 12€ e outro de 6€*(S+M).
4)    Esta modificación entra en vigor o día 8 de maio de 2014.
5)    Aplicarase ás persoas que se fagan socios/as despois desta data.
6)    Aos socios/as actuais, que xa abonaran a cota de 2014, se lles aplicará a redución da cota para segundos e sucesivos socios/as a partir de 2015, debendo comunicar á Asociación os datos das persoas que integran a unidade familiar e quedan vinculados entre si.
7)    Os segundos e sucesivos socios/as de socios actuais que se dean de alta na Asociación a partir do 8 de maio abonarán unha cota de 6€, deberán indicar, ademais dos seus datos persoais, o socio/a ao que se vincularán. Poderán descargar o formulario na blog da Asociación.
8)    Continuar demandando ás autoridades locais, grupo de goberno e grupos da oposición, a mellora das infraestruturas e servizos do barrio.

Rogos e preguntas:

 
1)    Constituír unha comisión para levar a cabo as festas do San Xoán, sardiñada e cacharela, o 21 de xuño de 2014.
2)    Vaise a facer unha captación de novos socios mediante a venta de invitacións para a sardiñada de San Xoán.

Lembra:

O prazo para o pago da cota de 2014 rematou o día 31 de marzo. Se aínda non estás ao día coa túa cota e, para que a asociación poida facer as actividades previstas, debes facer o pago da mesma o antes posible na CC que ten a Asociación en NovaGalicia Banco ES15-2080-0392-2430-4000-4227.
É moi importante facer máis socios/as na nosa familia, agora é máis barato coa modificación aprobada para as persoas dunha unidade familiar, só 6€ por persoa ao ano.
Unha masa social numerosa permite que os logros da Asociación sexan maiores, no que se refire á atención prestada polas autoridades e responsables de darnos servizos, e no que se refire á posibilidade de desenvolver actividades no barrio.
Este ano temos que ser máis de 100 socios/as, invita tamén aos teus amigos/as, veciños/as, a facerse socios/as e a participar para facer barrio.

A presidenta Marina López Prieto

Convocatoria de asemblea xeral extraordinaria

Data: Mércores 7 de maio de 2014.
Hora: ás 20:30 h. en 1ª convocatoria e as 20:45 h. en 2ª convocatoria
Lugar: Salón de actos do Centro Sociocultural de Fontiñas.
Orde do día:
▪          Lectura e aprobación da acta da asemblea xeral do 26 de febreiro de 2014
▪          Aprobación da cota de 6€ para segundos e sucesivos socios/as e menores dunha unidade familiar.
▪          Aprobación da modificación do Regulamento filiación de socios/as na que se regulan as cotas dos socios/as.
▪          Información sobre a última entrevista mantida pola Asociación coa concelleira Dª María Pardo Valdés.
▪          Rogos e preguntas.

A Presidenta: Marina López Prieto

¡¡¡ Asiste e participa no desenvolvemento da asociación, necesitamos traballar xuntos para mellorar o noso barrio, o barrio de todos e todas !!!

Proposta de reforma do Regulamento de filiación de socios/as.

Cota anual de socio/a:

·         Redacción en vigor:
As cotas teñen sempre carácter anual (ano natural). A cota por socio adulto é de 12€ independentemente do mes do ano en que se inscriba. A baixa na asociación non da dereito a devolución da cota. Os menores abonarán unha cota anual de 6€ ata o ano no que acaden a maioría de idade.

·         Nova redacción:
As cotas teñen sempre carácter anual (ano natural). A cota por socio/a establécese en 12€ anuais, independentemente do mes do ano en que se inscriba. Co fin de favorecer a participación nas actividades da asociación das familias e incrementar o número de socios/as, establécese unha cota anual de 6€ para segundos ou sucesivos socios/as e menores dunha unidade familiar, que así o acrediten cando realicen a súa solicitude.

A cota resultante das unidades familiares abonarase nun recibo único e calcularase aplicando a seguinte formula: Cota anual familiar =12€+((S+M)*6€), sendo S o nº de sucesivos socios e M o nº de socios menores. As cotas familiares sempre terán un sumando de 12€ e outro de 6€*(S+M).

Resumo da entrevista coa Concelleira delegada de Urbanismo, Vivenda, Rehabilitación...

Desde que se constituíu a nosa asociación reclamouse, ao grupo de goberno e aos outros grupos municipais, reiterada e insistentemente o arranxo das infraestruturas deterioradas do barrio e unha mellora dos servizos públicos. Estas reclamacións recolléronse nun informe da Xunta Directiva que foi presentado e aprobado na asemblea extraordinaria do 27 de outubro de 2011.

Na xuntanza mantida o día 3 de marzo de 2014 cos concelleiros do grupo de Goberno María Pardo Valdés, Luís Meijide Rodríguez e José María Rosende Rico., a Concelleira delegada de Urbanismo, Vivenda... informounos do estado en que se encontran a actuacións para dar resposta as nosas demandas, de xeito resumido, a situación é a seguinte:

1.    Actuación sobre a rúa Fonte dos Concheiros, Fontiñas e Valiño. Xa está redactado o proxecto, aínda que está sen superar as distintas fases previas a súa aprobación e execución. Esta actuación será presentada aos veciños e o orzamento estimado é de 1.124.710€.
Esta actuación ordenará os espazos, eliminará barreiras, humanizará o barrio, aumentará a seguridade dos veciños e mellorará as infraestruturas das rúas afectadas.

2.    No prazo de dous meses, a asociación será informada sobre a posible actuación de urbanización da rúa Altiboia.

3.    Outras deficiencias, de menor entidade, serán atendidas cos presupostos anuais que ten a de Concelleira delegada de Urbanismo, Vivenda, Rehabilitación, Cidade Histórica, Patrimonio, Sostenibilidade, Sanidade e Cemiterios, tralo o requirimento da Asociación e despois da avaliación dos técnicos municipais.

4.    Igualmente, o Concello reclamará a tres empresas, responsables de promocións de vivendas, que procedan a arranxar os danos producidos no barrio durante a execución das obras, á eliminación de materiais de construción e á recuperación de zonas verdes.

5.    En relación o parque do Polígono 4 de Fontiñas – Cotaredo, a Asociación será recibida polo Sr. Alcalde para ser informada e escoitada sobre todos os pormenores desta zona verde, antes da súa inaguración.

6.    Limpárase a fonte do “Cabezón”, na rúa Fontiñas, e manteranse limpas de maleza as zonas sen urbanizar.

7.    Colocaranse as placas de identificación da rúa Cotaredo e da praza de Uruguay.

Acordo da asemblea xeral ordinaria do 26 de febreiro de 2014

Acordos:

1. Por unanimidade apróbanse a acta da asemblea xeral extraordinaria do 25 de outubro de 2013.
2. Por unanimidade apróbase a memoria de actividade e memoria económica de 2013
3. Por unanimidade apróbase a planificación de actividades e económica para o 2014 que será a seguinte:

• Sardiñada de San Xoán, 21 de xuño, rúa Cotaredo. (Custo estimado 900 €)
•  Festa do outono, 19 de outubro no parque de Fontiñas. Festa de xogos para nenos e para adultos, magosto. (Custo estimado 800 €)
•  Pincho de Nadal. (Custo estimado 300 €)
•  Outras actividades, máximo 4, sen custo para a AV, agás os que deriven da súa organización e que non superarán os 60 € por actividade.
• Orzamento previsto para o ano 2014 é de 2.500 €.

4. Por unanimidade apróbanse dar de baixa aos socios que, despois de comunicarlle a resolución da asemblea xeral, non abonen antes do 31 de marzo de 2014 as cotas correspondentes aos anos 2013 e 2014. O efecto da baixa terá data de 1 de abril de 2014. Faise unha excepción con un socio, que comunicou as súas dificultades económicas, prorrogándolle a súa condición de socio durante o ano 2014
5. Continuar coa denuncia ante as autoridades municipais do estado lamentable dalgunhas beirarrúas do barrio e doutros servizos municipais, iluminación, contedores do lixo, rúa Altiboia, escaleiras Camiño Francés – rúa Valiño.
6. Co fin de incrementar o nº de socios e socias acordouse redactar as instrucións necesarias, se non hai impedimento legal, para que as persoas que vivan nun mesmo domicilio teñan unha redución na cota das segundas e sucesivas altas de membros desa unidade familiar. 

Convocatoria asemblea xeral ordinaria 2014

Data: Mércores 26 de febreiro de 2014.

Hora: ás 19:30 h. en 1ª convocatoria e as 20:00 h. en 2ª convocatoria

Lugar: Salón de actos do Centro Sociocultural de Fontiñas.

Orde do día:

• Lectura e aprobación da acta da asemblea xeral do 25 de outubro de 2013.
• Presentación e aprobación da memoria de actividade de 2013.
• Presentación e aprobación da memoria económica de 2013.
• Presentación e aprobación da planificación de actividades para o 2014.
• Presentación e aprobación da planificación económica para o 2014.
• Información das entrevistas co grupo de goberno municipal e cos outros grupos políticos.
• Baixas de socios.
• Rogos e preguntas.

A Presidenta: Marina López Prieto

¡¡¡ Asiste e participa no desenvolvemento da asociación, necesitamos traballar xuntos para mellorar o noso barrio, o barrio de todos e todas !!!

Memoria de actividade de 2013.

A asociación desenvolveu durante o ano 2013 as seguintes actividades:

• Asemblea xeral ordinaria o 21 de febreiro de 2013.
• Asemblea xeral extraordinaria de 2 de abril de 2013.
•  Asemblea xeral extraordinaria de 25 de outubro de 2013.
• 13 reunións da xunta directiva.
• Entrevistas cos Srs. concelleiros do grupo de goberno (D. Luís García Bello, Dª. María Pardo Valdés, D. Luís Meijide Rodríguez.). Do PSdeG (D. Francisco Reyes, D. Bernardino Rama e D. Gonzalo Muiños). Do BNG (D. Rubén Cela e Dª. Elvira Cienfuegos).
• Sardiñada de San Xoán.
• Magosto.
• Pincho do Nadal.
• Outras actividades (Charlas de saúde, curso de cociña)

Memoria económica de 2013.

O saldo da asociación a 31 de decembro de 2013 é o que se presenta na seguinte táboa.

CC NOVAGALICIA BANCO	3.511,63 €
Subvencións Concello de Santiago	816,94 €
Tesourería	166,55 €		Efectivo
Camisetas	300,00 €		Especie 42€
SALDO a 31 de decembro	4.795,12 €

 O balance económico do ano 2013 é o que se presenta na seguinte táboa.

Conceptos	Ingresos	Gastos
Saldo da AV a 31 de decembro de 2012	4.544,94 €
Cotas de socios	864,00 €
Socio descoñecido	12,00 €
Financieiros (devolución 12)	4,80 €
Subvención 2013	816,94 €
Actividades (curso de cociña)	52,00 €		Devolución 14
Camisetas	300,00 €	272,25 €
Inversións		97,99 €
Administración		222,20 €
Actividades		1.154,32 €
Financeiros		52,80 €
Totais	6.594,68 €	1.799,56 €
SALDO a 31 de decembro			4.795,12 €

As contas están a disposición de todos os socios e socias o día da asemblea ou cando se requira, solicitándoo no teléfono 662 005 756.

Proposta/planificación de actividades para o 2014.

A xunta directiva propón desenvolver en 2014 as actividades que se relacionan a continuación:

• Sardiñada de San Xoán, 21 de xuño, rúa Cotaredo. (Custo estimado 900 €)
• Festa do outono, 19 de outubro no parque de Fontiñas. Festa de xogos para nenos e para adultos, magosto. (Custo estimado 800 €)
• Pincho de Nadal. (300 €)
• Outras actividades, máximo 4, sen custo para a AV, agás os que deriven da súa organización e que non superarán os 60 € por actividade.

O custos do desenvolvemento destas actividades serán atendidos cos fondos propios da asociación e con subvencións. Os custos doutras actividades deberán ser asumidos polos seus promotores.

Proposta/planificación económica para o 2014.

A xunta directiva propón para o ano 2014 un orzamento de 2.500 €, segundo se especifica na táboa.

Concepto	Ingresos	Gastos
Cotas socios (75)	900,00 €
Subvencións	1.600,00 €
Inversións		214,00 €
Administración		250,00 €
Actividades		2.000,00 €
Financeiros		36,00 €
Totais	2.500,00 €	2.500,00 €