Ciclo de charlas divulgativas de saúde

A diabetes
Relator: Dr. Manuel Quintas Ares

Datas: 2, 16 y 30 de abril
Lugar: Salón de actos do Centro Sociocultural de Fontiñas
Hora: 19:30

Entrada libre

Información da ASEMBLEA XERAL ORDINARIA 2013

Resumo do tratado na asemblea xeral ordinaria, celebrada o 21 de febreiro de 2013, e os acordo tomados.

Temas tratados:

1.   Lectura e aprobación da acta da asemblea xeral do 23 de febreiro de 2012.
2.   Información sobre as entrevistas co grupo de goberno municipal e cos outros grupos políticos.
3.  Presentación e aprobación da memoria de actividade de 2012.
4.  Presentación e aprobación da memoria económica de 2012.
5. Presentación e aprobación da planificación de actividades para o 2013.
6. Presentación e aprobación da planificación económica para o 2013.
7.  Baixas de socios e socias.
8.  Proposta de reforma dos estatutos e do Regulamento para a elección da xunta directiva.
9. Proposta de explotación da horta da Asociación.
10. Rogos e preguntas.

Acordos:

Por unanimidade apróbase:

1.  A memoria de actividade, memoria económica e contas de 2012.
2.  A planificación de actividades a planificación económica para o 2013.
3.  Comunicar a baixa aos socios que non abonaron a cota de 2012.
4.  Requirir ao Concello para que arranxe as deficiencias no barrio relacionadas coas beirarrúas, pasos de peóns, rúas, alumeado, parques, etc.
5.  Informar aos grupos municipais sobre estas deficiencias e do esquecemento a que está sometido o barrio por parte do Goberno Municipal
6.  Denunciar a saída de augas fecais detrás do Mesón Os Concheiros.
7.  Convocar unha asemblea extraordinaria para a aprobación:

• Do escrito de reclamación de deficiencias do barrio.
• Da reforma dos estatutos no que re refire á composición da xunta directiva e o regulamento da súa elección.

Nota importante

Para facilitar o normal funcionamento da asociación e desenvolvemento de actividades, todos os socios/as debemos abonar a cota anual (12€) antes do 31 de marzo na CC que ten a Asociación en NovaGalicia Banco (2080-0392-24-3040004227).

Lémbrase a todos/as que é moi importante facer máis socios/as. Unha masa social numerosa permite que os logros da Asociación sexan maiores, no que se refire á atención prestada polas autoridades e responsables de darnos servizos, e no que se refire á posibilidade de desenvolver actividades no barrio. Este ano temos que ser 100 socios/as, fai socio/a ao teu veciño/a, verás como vai a quedar satisfeito.

A presidenta Marina López Prieto

Convocatoria asemblea xeral ordinaria 2013

Data: Xoves, 21 de febreiro  de 2013 ás 19:30 h. en 1ª convocatoria e as 20:00 h. en 2ª convocatoria
Lugar: Salón de actos do Centro Sociocultural de Fontiñas.
Orde do día:

• Lectura e aprobación da acta da asemblea xeral do 23 de febreiro de 2012
• Información sobre as entrevistas co grupo de goberno municipal e cos outros grupos políticos.
• Presentación e aprobación da memoria de actividade de 2012.
• Presentación e aprobación da memoria económica de 2012.
• Presentación e aprobación da planificación de actividades para o 2013.
• Presentación e aprobación da planificación económica para o 2013.
• Baixas de socios e socias.
• Proposta de reforma dos estatutos e do Regulamento para a elección da xunta directiva.
• Proposta de explotación da horta da Asociación.
• Rogos e preguntas.

A Presidenta: Marina López Prieto

Memoria de actividade de 2012.

A asociación desenvolveu durante o ano 2012 as seguintes actividades:

• Asemblea xeral ordinaria o 23 de febreiro de 2012.
• Entrevistas co Sr. Alcalde e con distintos concelleiros.
• Sardiñada de San Xoán.
• Magosto.
• Pincho do Nadal.
• Outras actividades (Colaboración co Centro Sociocultural de Fontiñas na Festa gastronómica do Entroido, excursións Vive, Vivamos, Vivenzas)

Memoria económica de 2012.

O saldo da asociación a 31 de decembro de 2012 é o que se presenta na seguinte táboa.

CC NOVACAIXAGALICIA BANCO	3.486,68 €
Subvencións Concello de Santiago	952,42 €
Caixa da Presidenta	105,84 €
SALDO a 31 de decembro	4.544,94 €

O balance económico do ano 2012 é o que se presenta na seguinte táboa.

Conceptos	Ingresos	Gastos
Saldo da AV a 31 de decembro de 2011	4.605,50 €
Cotas de socios	637,00 €
Subvención Concello	952,42 €
Inversións		474,29 €
Administración		120,79 €
Actividades		1.019,10 €
Financeiros		35,80 €
Totais	6.194,92 €	1.649,98 €
SALDO a 31 de decembro			4.544,94 €

As contas están a disposición de todos os socios e socias o día da asemblea ou cando se requira, solicitándoo no teléfono 609617566.

Proposta/planificación de actividades para o 2013.

A xunta directiva propón desenvolver en 2013 as actividades que se relacionan a continuación:

• Sardiñada de San Xoán, 23 de xuño, rúa Cotaredo. (Custo estimado 450 €)
• Festa da primavera, 4 ou 18 de maio no parque de Fontiñas. Festa de xogos para nenos, de chave para adultos, concurso de tortillas de patacas. (Custo estimado 275 €)
• Festa do outono, 19 de outubro no parque de Fontiñas. Festa de xogos para nenos, de chave para adultos, magosto. (Custo estimado 275 €)
• Pincho de Nadal. (200 €)
• Ciclo de charlas sanitarias. Periodicidade trimestral sobre temas de saúde pública e comunitaria. (Sen custo para a AV, agás os que deriven da súa organización e que se imputarán ao capítulo de administración)

O custos do desenvolvemento destas actividades serán atendidos cos fondos propios da asociación e con subvencións. Os custos doutras actividades deberán ser asumidos polos seus promotores.

Proposta/planificación económica para o 2013.

A xunta directiva propón e prevé un orzamento para o ano 2013 de 1.920 €, segundo se especifica a continuación.

Concepto	Ingresos	Gastos
Cotas socios (60)	720,00 €
Subvencións	1.200,00 €
Inversións		400,00 €
Administración		284,00 €
Actividades		1.200,00 €
Financeiros		36,00 €
Totais	1.920,00 €	1.920,00 €

Pincho de Nadal 2012

O próximo sábado 15 de decembro,  a AV. O Camiño das Fontiñas organiza para os socios e socias o tradicional "Pincho de Nadal" na cafetería Rakel, Rúa Fontiñas, a partir das 13:00 horas.
Estades todos invitados.

Visita do alcalde, D. Ángel Currás, ao barrio

O alcalde compostelán, Ángel Currás, acompañado polo concelleiro de Barrios, Juan de la Fuente, e polos integrantes da Asociación de Veciños O Camiño das Fontiñas, percorreu algunhas das rúas entre os Concheiros e San Lázaro e lindeiras co polígono das Fontiñas.

Esta visita fora un compromiso do alcalde adquirido nunha recente reunión en Raxoi coa asociación veciñal. Ángel Currás puido comprobar de primeira man as deficiencias formuladas polos veciños naquela xuntanza, que afectan fundamentalmente ao mal estado dalgunhas beirarrúas.

O alcalde puido constatar a existencia de zonas de beirarrúas non adaptadas para minusválidos. Así, a propósito dalgún obstáculo observado, referiuse a "actuacións incomprensibles en obras realizadas recentemente". Tamén comprobou a existencia dun tramo mesmo sen beirarrúas, malia terse realizado a cesión do terreo para as mesmas, e doutros tramos con lousado levantado. A situación agrávase máis aínda, dixo, tendo en conta que esta é a porta de entrada do Camiño Francés na cidade.

Á vista desta situación, o rexedor municipal apuntou a necesidade de abordar unha mellora integral das rúas nesta parte da cidade, que o Goberno municipal irá acometendo en función da dispoñibilidade orzamentaria.

Ver máis en:
Noticia en Web do Concello
Noticia en La Voz de Galicia
Noticia en El Correo Gallego

Recepción municipal; Comunicado

Santiago de Compostela, 5 de novembro de 2012.

A AV "O Camiño das Fontiñas" ven de manter unha xuntanza co Sr. Alcalde de Santiago de Compostela. Os representantes da Asociación trasladáronlle as queixas dos veciños e veciñas sobre o estado das infraestruturas e dos servizos do barrio das Fontiñas.

O barrio de Fontiñas ven sufrindo de xeito permanente a indiferenza das últimas Corporacións municipais. Todas as rúas e beirarrúas do barrio presentan un importante deterioro e multitude de barreiras arquitectónicas; con moita frecuencia as rúas están a sufrir fallas na iluminación pública; o servizo de recollida de lixo e pouco frecuente e carece de contedores soterrados; todos os días, a falla de control do tráfico produce un caos de circulación con vehículos estacionados enriba das beirarrúas e zonas prohibidas; moitos espazos verdes están cheos de maleza e son un foco de contaminación.

Na devandita reunión o Sr. Alcalde, tras coñecer as reivindicacións presentadas, adquiriu o compromiso de estudar polo miúdo toda a documentación achegada sobre o estado do barrio e de visitar o barrio para comprobar persoalmente estas deficiencias.

Magosto 2012

Con motivo da chegada do outono a AV "O Camiño das Fontiñas" organiza o próximo 3 de novembro, se o tempo o permite e desde as 18 horas, un magosto para todos os veciños e veciñas. 

Esta actividade desenvolverase na rúa Fontiñas, diante da fonte do Cabezón, e consistirá en disfrutar os veciños e veciñas dunhas horas de convivenza e saborear unhas castañas e bebidas para dar a benvida ao outono.

Estades todos e todas convidad@s 

A presidenta da AV. O Camiño das Fontiñas 

Marina López Prieto

Éxito da sardiñada

A sardiñada de san Xoan xuntou a máis de sesenta veciños e veciñas que disfrutaron das sardiñas asadas, da cacharela e duns momentos de convivenza veciñal inolvidables.
Foi unha noite máxica para todos os asistentes. A seguinte foto reflicte este éxito.

Quedades convidados para a sardiñada do próximo ano e ás actividades que vai a organizar a AV no próximo outono.

Noite de San Xoán

Estimados socios e socias, a asociación ten previsto organizar a sardiñada e a cacharela de San Xoán o próximo sábado 23 de xuño, ás 21:00 horas.

Esta festa é gratis para todos aqueles socios e socias que teñan abonada a cota do ano en curso. A cada socio/a corresponderalle unha invitación para dúas persoas, que da dereito a sardiñas, pan e bebidas.

Co fin de estimar as sardiñas, o pan e as bebidas que se necesitan é necesario que todos os socios e socias se apunten chamando por teléfono ou escribindo un correo electrónico, antes do día 18 de xuño, indicando o número de persoas que van a asistir.

A sardiñada e a cacharela desenvolverase na rúa Cotaredo, á altura do Inen. As sardiñas empezaranse a asar ás 21:00 horas ata terminalas.

As persoas que non pertenzan á asociación e que queiran participar nesta festa deberán apuntarse igualmente e deberán pagar 3 € por persoa.

Festa da primavera

A Festa da Primavera suspendeuse para outra data, aínda por determinar, por mor da choiva. Avisarase da nova data.

Actividades para o mes de maio e xuño

1. Festa da primavera. Con motivo do día da nai e coa colaboración do Concello a nosa Asociación organiza a 1ª Festa da Primavera. Esta de actividade desenvólvese o día 5 de maio entre as 17:00 e as 20:00 horas e está destinada aos máis pequenos do barrio. Haberá inchables, facilitados polo Concello e xogos tradicionais infantis. Non é necesario ser socio da Asociación para participar nesta actividade.

2.  Excursión á Ribeira Sacra. Esta excursión ten como principal actractivo a viaxe en catamarán polos cañóns do río Sil, visita a unha bodega da zona e ao castelo de Castro Caldelas. A duración e dun día e o custo aproximado por persoa é de 40 €, incluído o xantar. Está actividade desenvolverase se o número de persoas interesadas permite facer un grupo. Os interesados deberán apuntarse, por correo electrónico ou teléfono[1], antes do 14 de maio e pagar a excusión, de levarse a cabo, antes do 18 de maio. No caso de que a demanda sexa moi alta seguirase a orde de inscripción para a reserva da praza.

3.  Excusións a pé. A 1ª o sábado 19 de maio excursión ao Pedroso, saída ás 17:30, merenda e xogos para nenos na Finca do Sexto e volta. A 2ª o sábado 16 de xuño, excursión desde Arca a Santiago percorrendo o camiño de Santiago e xantando no camiño. Desplazarémonos en autobus ata Arca a media mañá e chegaremos ao noso barrio pola tarde. Os interesados deberán apuntarse ata dos días antes, por correo electrónico ou teléfono¹, para poder establecer todo o necesario para o desprazamento e o xantar, que será con cargo a cada participante.

4. Sardiñada de San Xoan. A xunta directiva, ao non presententarse socios e socias voluntarios para participar no desenvolvemento desta actividade, está buscando alternativas que permitan levar a cabo a sardiñada e a cacharela. Pregamos a todas as persoas, que queiran arrimar o seu ombro para desenvolver esta actividade, comunique á xunta directiva a súa dispoñibilidade. 

Entroido 2012

Socios e socias do barrio celebrando o Entroido.

Recepción no Concello

O alcalde compostelán, Xerardo Conde Roa, xunto cos concelleiros Francisco Noya e Juan de la Fuente, reuniuse coa Aociación de Veciños "O Camiño" das Fontiñas. Na xuntanza, os representantes veciñais puideron formularlle ao alcalde e aos concelleiros as súas principais demandas para o barrio.

Entroido gastronómico

Con motivo do Entroido o Centro Sociocultural das Fontiñas organizou en colaboración coa AV O Camiño das Fontiñas unha degustación gastronómica de larpeiradas (filloas, orellas, buñuelos, etc.) o día 15 de febreiro.

Asistiron numerosos veciños e veciñas do barrio e do polígono das Fontiñas que disfrutaron duns momentos agradables saboreando as larpeiradas traídas por varios socios/as da nosa asociación e bebidas aportadas polo centro sociocultural das Fontiñas.